దాంపత్య సంబంధాలను ముఖ్యంగా లైంగిక సంబంధాలను మొక్కుబడిగా తీర్చుకునే పరిస్థితే మనిషి జీవితంలో ఏర్పడితే అంతకుమించిన నరకం ఇంకొకటి లేదు. నిద్రలేచింది మొదలు తిరిగి ఇంటికి వచ్చి కాస్త తిని పడుకునేంత వరకు క్షణం తీరిక లేని వృత్తులు రానురాను సమాజంలో పెరుగుతుండడంతో దంపతుల మధ్య లైంగిక సంబంధాలు దారుణంగా దెబ్బతింటున్నాయని ఇటీవలి సర్వేలు తెలియజేస్తున్నాయి.
సాఫ్టవేర్ బూమ్ అనండి, ఇతర వృత్తుల్లో మితిమీరిన పోటీ తత్వం కారణంగా నిత్యం పనిలో పెరుగుతున్న ఒత్తిడి ప్రభావంగా కానీండి. భార్యాభర్తలు రోజులో కలిసి ఉండే సమయం, తమ సమస్యలను, సంతోషకర క్షణాలను పంచుకునే సమయం రానురాను హరించుకుపోతున్నాయని ఈ సర్వేలు తెలియజేస్తున్నాయి.
ఇటీవలే బ్రిటన్‌లో దంపతుల సమయంపై జరిగిన ఓ సర్వేలో రోజు మొత్తంలో తాము కలిసి విషయాలను కలబోసుకుంటూ ఉండే సమయం 15 నిమిషాలు మాత్రమే అనే విషయాన్ని అని వందలాది దంపతులు బయటపెట్టారు.
పని ఒత్తిడి కారణంగా, విశ్రాంతి సమయం కొరవడిన కారణంగా, లైంగిక జీవితంలో జడత్వం కారణంగా యూరప్‌లో అమెరికాలో, జపాన్ తదితర పారిశ్రామిక దేశాల్లో సంతానోత్పత్తి కరువై జనాభా పెరుగుదల క్షీణించిపోయిన చరిత్రను మనం చూస్తూనే ఉన్నాం.
ఈ స్థితి ఆసియా దేశాలకు ఇప్పటికిప్పుడే వర్తించక పోయినా దంపతుల జీవితంలో అతి ముఖ్యభాగమైన లైంగిక సంబంధాలు కురుచబారిపోవడం ఇప్పటికే ప్రమాద ఘంటికలు మోగిస్తున్నట్లు వార్తలు రోజూ చూస్తూనే ఉన్నాం.
మొత్తానికి ఒకటి మాత్రం నిజం. సాంప్రదాయిక సమాజాల్లోని తీరిక, విశ్రాంతి ఇప్పటి సాంకేతిక జీవన విధానంలో లభ్యం కాదు. ఉదయం 9 గంటలకు ఇంటినుంచి బయటపడితే రాత్రి ఓ పదికో పదకొండుకో ఇంటికి చేరవలసిన విధులు (ప్రయాణాలు కలుపుకుని) మనకు ఇష్టమైన ఎన్నో అభిరుచులను మనకు దూరం చేస్తున్నాయి.
ఒక మంచి సంగీతాన్ని వినేందుకు, మధుర గీతాలు ఆస్వాదించేందుకు, అన్నింటికంటే మించి వారానికి కాకపోతే నెలకు ఒకసారైనా మార్కెట్లోకి వచ్చిన లేదా స్వంత లైబ్రరీలో ఉన్న మంచి పుస్తకాన్ని చదివేందుకు మనకు సమయం ఉండడం లేదు.
ఇంతకు ముందు ఎన్నడూ లేనంత అలసట. పని స్థలం నుంచి ఇంటికి వచ్చాక ఇక ఏ పనీ చేయడానికి ఓపిక లేనంత బడలిక ఇంటికూడు చేసుకుని తినడం కంటే బయటి ఏ రోడ్డుమీది బంకులోనో, హోటల్లోనో కాసింత పొట్టలో వేసుకుని పడుకుంటే చాలు అనిపించేంత నిస్తత్తువ. ఇక వ్యాయామం అంటారా దేవుడెరుగు...
ఇక దంపతులు ఇరువురూ పనిచేస్తున్న సందర్భాల్లో అయితే వారు కలుసుకునే క్షణాలు అరుదైపోతున్నాయి. షిప్టుల విభజనలో భార్య ఒక షిప్టు, భర్త ఒక షిఫ్టుగా విడిపోయే రకం పనుల్లో అయితే ముఖాముఖాలు చూసుకోని పరిస్థితి...
దీనికి తోడు కాసింత తీరిక సమయం అంటూ దొరికితే మన ఇంట్లో, మన చుట్టూ వచ్చి పడుతున్న హైటెక్ గాడ్జెట్లతో మన అనుబంధం పెరుగుతోంది తప్ప దంపతుల మానసిక బంధాలవైపు కన్నెత్తి చూసే స్థితి అంతరిస్తోంది అంటే ఆశ్చర్యపోవలసిన పనిలేదు. టీవీ చూడందే తిండి తినలేం..
అదీ వార్తలు కాదు... కామెడీ సీన్లు, ఉబుసు పోక కబుర్లతో దండెత్తుతున్న చప్పన్నారు ఛానెళ్ల చప్పన్నారు ప్రోగ్రాములు... కుటుంబాల మధ్య తరాల మధ్య అంతరాలు పెరిగినప్పుడు, మనిషితో మనిషి మాట్లాడుకునే వాతావరణం ఇంటిలోగిలిలో కొరవడిన చోట కబుర్ల చానెళ్లు, ప్రోగ్రాములే కదా జీవితంలో మిగిలేది.
జీవితం సాక్షిగా దంపతులు తమ జీవితంలో బయటినుంచి జరుగుతున్న ఈ కొత్త తరహా దాడుల పట్ల సీరియస్‌గా దృష్టి పెట్టాలి. లైంగిక జీవితం గడిపేందుకు తగిన శక్తిని కోల్పోతే ఆ ఆసక్తే మన జీవితాల్లో మిగలకుండా పోయే ప్రమాదముంది. ఆలోచించండి.. ఆ'శక్తే' లేకపోతే ఆసక్తి ఎలా ఉంటుంది?
